အပိုင်း (၃၄) : ဒုက္ခရောက်ချိန်များ၌ စိတ်တည်ငြိမ်မှု ရှာဖွေခြင်း
“ဒီကယဉ်ကျေးမှုမှာ ဓမ္မက အလွန် အချက်အချာကျတဲ့အတွက် ဒီနေရာ(မြန်မာပြည်)အကြောင်းကို ရေးသားတဲ့ ပြည်ပမီဒီယာက လူတွေ နားမလည်ကြသေးပါဘူး။ ဒါကြောင့်လဲ ဒီအကြောင်းအရာမျိုးစုံကို ယဉ်ကျေးမှု ဓလေ့ထုံးတမ်း တခုလုံးအတွက် ဘယ်လောက်ထိ အရေးကြီးသလဲဆိုတာ ဃဂဏန နားလည်မှုမရှိဘဲ သတင်းလုပ်ပြီး အစီရင်ခံနေကြတာ။”
ရန်ကုန်မြောက်ပိုင်း ချမ်းမြေ့မြိုင်ကျောင်းမှာ သီတင်းသုံးနေတဲ့ အမေရိကန် ဆရာလေး ဒေါ်ဝီရဉာဏီက ဒီလို မိန့်ကြားလိုက်ပါတယ်။ ဖေဖော်ဝါရီ ၁ ရက် အာဏာသိမ်းကတည်းက မြန်မာပြည်အကြောင်းက လူပြောများနေတဲ့ အကြောင်းအရာဖြစ်ပြီး အဓိကသတင်းတွေက သတင်းကွန်ယက်နဲ့ လူမှုကွန်ယက်တွေမှာ ပျံ့နှံ့နေတာပါ။ ဒေါ်ဝီရဉာဏီ ထောက်ပြသလိုပဲ တိုင်းပြည်ရဲ့ အနှစ်သာရ ပင်မဗုဒ္ဓဘာသာ ကျင့်စဉ်တွေကို နားလည်ဖို့ နေနေသာသာ သတင်းတွေမှာ ဖော်ပြတာ သိပ်မရှိလှပါဘူး။
တရားအားထုတ်ကြတဲ့ အသိုင်းအဝိုင်းထဲက ယောဂီတွေအတွက် မြန်မာဆိုတာ သူတို့ရဲ့ နှလုံးသားထဲမှာ အထူးနေရာယူထားတာဖြစ်လို့ ဒီတပတ်မှာ နေရတာ တော်တော်လေး ခက်ခဲပါတယ်။ ဒါကြောင့်မို့ ပညာသားပြည့်ဝတဲ့ စကားတွေကို ရင်နှင့်အမျှ လေ့ကျက်ဆောင်ယူထားတဲ့ တရားအားထုတ်ဖော် အားထုတ်ဖက်ထံမှ ကြားနာရတာ အလွန် အဖိုးတန်လှပါတယ်။ အခု ရင်ဆိုင်နေရတဲ့ စိန်ခေါ်မှု အကျပ်အတည်းတွေဖြစ်နေတဲ့ ဒေသထဲမှာ အမှန်တကယ်နေထိုင်နေသူ တဦးလည်း ဖြစ်ပါတယ်။
ဒီမေးမြန်းခန်းမှာ ကျွန်တော်တို့ လက်ရှိအခြေအနေကို ထောက်ပြထားပေမဲ့ အဓိက ပါဝင်သူတွေရဲ့ အတ္ထုပ္ပတ္တိတွေ၊ သမိုင်းနဲ့ နိုင်ငံရေးနဲ့ ပတ်သက်လို့ ခွဲခြမ်းစိတ်ဖြာရေး ရှုထောင့်တွေကို ရှောင်ရှား ဆွေးနွေးထားပါတယ်။ အဲ့ဒီအစား လက်ရှိအခိုက်အတန့်ကို ဗုဒ္ဓဘာသာ ရှုထောင့်ကနေ တင်ဆက်ထားပါတယ်။ မေတ္တာ ကမ္မဋ္ဌာန်း အားထုတ်ခြင်း ဒါမှမဟုတ် မေတ္တာ ဘာဝနာ လေ့ကျင့်ပွားများခြင်းရဲ့ စွမ်းအားကြီးပုံနဲ့ ကျွန်တော်တို့တွေ တချို့ပုဂ္ဂိုလ်တွေအပေါ် မကျေနပ်ချက်တွေ ရှိရင်တောင်မှ—သက်ရှိအားလုံးအပေါ် ဆုမွန်ကောင်းဖြင့် မေတ္တာရောင်ခြည် ဖြန့်ကျက်စေလွှတ်ရမည့်အကြောင်းကို ဒေါ်ဝီရဉာဏီမှ မျှဝေထားပါတယ်။
ဒေါ်ဝီရဉာဏီမှ ရွှေနိုင်ငံရဲ့ကျေးဇူးတရားနက်နဲပုံ၊ သူမရဲ့ တရားလမ်းကြောင်းတလျှောက် နိုင်ငံနဲ့ ဓလေ့တို့က အရေးပါကြောင်း ဆွေးနွေးရင်းနဲ့ အခြားအကြောင်းအရာတွေလည်း ပြောဖြစ်ကြပါတယ်။ အမေရိကန်နဲ့ ဗမာ အသိုင်းအဝိုင်းကြား လူမှုရေး တရားမျှတမှုနဲ့ ကမ္မဋ္ဌာန်း အားထုတ်မှု ကွာခြားပုံတွေကိုလည်း ဆန်းစစ်လေ့လာထားပါတယ်။ ဒီလို ခက်ခဲတဲ့ကာလမှာ သူမ စိတ်ထဲမှာ အလွှမ်းမိုးဆုံး သုတ္တန် ဒေသနာတော်တွေနဲ့ လက်ရှိအားထုတ်နေတဲ့ ကျင့်စဉ်တွေကို မျှဝေထားပါတယ်။ ကမ္ဘာတဝှမ်းက ယောဂီတွေ ဒီအချိန်မှာ ရင်ဆိုင်နေတဲ့ ဝမ်းနည်းမှု၊ ဒေါသ၊ မျှော်လင့်ချက် ပျက်ပြားခြင်း စတဲ့ ခံစားချက်တွေကို နားလည်ပေမဲ့ ဒီအချိန်က ပြန်လည် လေ့ကျင့်အားထုတ်ဖို့အချိန်လို့ ယုံကြည်ပါတယ်။ ကျွန်တော်တို့ကို နှိုးဆော်ပေးတာက “သံသရာက ဖြေရှင်းပေးသွားမှာ မဟုတ်ပါဘူး”တဲ့။ ဆိုလိုချင်တာက ဒီလောကထဲမှာ ကျွန်တော်တို့ လောဘ၊ ဒေါသ၊ မောဟနဲ့ လှည့်စားခံရတာတွေ ဘယ်တော့မှ လွတ်မှာမဟုတ်ဘူး။ ဒါတွေက ကွဲပြားတဲ့ ပုံစံအသစ်တွေ ဆက်ကာ ဆက်ကာ ပြောင်းလဲနေတာ ဖြစ်လို့ပါပဲ။
ဒါက ကျွန်တော်တို့ Insight Myanmar Podcast ရဲ့ လုပ်ငန်းစဉ်နဲ့ ပတ်သက်တဲ့ မှတ်ချက်လေးပါ။ ကျွန်တော်တို့ အပိုင်းတပိုင်း ထုတ်လုပ်ဖို့ အတွက် ရက်သတ္တပတ်များစွာ အချိန်ယူရပေမဲ့ အခုကာလ ပိုပြီးလျင်မြန်တဲ့ အလှည့်အပြောင်းနဲ့ လိုအပ်ချက်တွေကြောင့် ဒီအပိုင်းလေးကို (၄၈) နာရီနဲ့အပြီး ထုတ်လုပ်နိုင်ခဲ့ပါတယ်။ ဒါပေမယ့်လည်း စေတနာ့ဝန်ထမ်း အဓိကထားတဲ့ အဖွဲ့အစည်းဖြစ်လို့၊ အထူးသဖြင့် ရန်ပုံငွေ အကန့်အသတ်ဖြင့် လုပ်ရတဲ့အတွက် စိန်ခေါ်မှုတွေ ရှိနေနိုင်ပါတယ်။ ဒီနေ့ခေါင်းစဉ်နဲ့ ပတ်သက်လို့ ဗုဒ္ဓဘာသာ လေ့လာလိုက်စားသူတွေ၊ ဆရာတော်တွေ၊ ပညာရှင်တွေနဲ့ တွေ့ဆုံမေးမြန်းခန်းတွေ ဆက်ပြီးလုပ်သွားဖို့ ကျွန်တော်တို့ မျှော်လင့်တဲ့အတွက် မိတ်ဆွေတို့ရဲ့ ပံ့ပိုးမှု လိုအပ်ပါတယ်။ ကျွန်တော်တို့အလုပ်ကို ကူညီလိုပါက မိတ်ဆွေတို့ရဲ့ ပံ့ပိုးကူညီမှုကို ကျွန်တော်တို့က ကြိုဆိုပါတယ်။ “Insight Myanmar” ကို PayPal, Venmo, CashApp, Go Fund Me, Patreon နဲ့ Credit Card စသည်ဖြင့် ပံ့ပိုးနိုင်ပါတယ် ခင်ဗျာ။