မြန်မာက သတင်းအချက်အလက်တိုက်ပွဲ
အာဏာသိမ်းမှုဖြစ်ပြီးကတည်းက Insight Myanmar Podcastရဲ့ တိုးပွားလာတဲ့ ပရိသတ်ထဲက အများစုက ပြည်ပနေမြန်မာပြည်ဖွားတွေဖြစ်မယ်ထင်ပါတယ်။ နိုင်ငံရပ်ခြားရောက် မြန်မာပြည်သူတွေဆီကနေ ကျွန်တော်တို့ podcastsဟာ သူတို့အတွက် လတ်တလောကာလမှာ တစ်ခုတည်းသောနားဆင်စရာ မီဒီယာဖြစ်ကြောင်း အီးမေလ်းတွေ ဘယ်နှစောင်လောက် ကျွန်တော်ရခဲ့ပြီးပြီလဲဆိုတာ ပြောမပြနိုင်လောက်အောင်ပါပဲ။ ဒီလိုနဲ့ ပြည်ပရောက်မြန်မာပြည်ဖွားတစ်ဦးဖြစ်တဲ့ ပြင်သစ်နိုင်ငံရောက် သီရိနန္ဒာနဲ့ ပြောဖြစ်ဖို့အကြောင်းဖန်လာပါတယ်။ အမိမြေနဲ့ဝေးကွာနေပြီး အာဏာသိမ်းမှုဖြစ်စဉ်ကိုဖြတ်ကျော်ရခြင်းရဲ့ အတွေ့အကြုံတစိတ်တပိုင်းကတော့ ဘယ်ဟာအမှန်လဲ ဘယ်ဟာကအမှားလဲဆိုတာ မသိနိုင်ခြင်းပါပဲ။ ကျွန်တော်တို့စကားဝိုင်းမှာလည်း ဒီကိစ္စကို သီရိကပြောသွားပါတယ်။
“ကျွန်မ တကယ်စိုးရိမ်လာတယ်။ ဘာကြောင့်လဲဆိုတော့ ကျွန်မဖေ့စ်ဘုတ်ကိုဖွင့်တဲ့အခါမှာ သတင်းက သုံးလေးမျိုးတက်လာပြီး ဘယ်တစ်ခုက ကျွန်မယုံကြည်ရမယ့်ဟာဆိုတာ လုံးဝမသိဘူးရှင့်။”
“သတင်းအမှားကိစ္စက မြန်မာမှာ သိပ်အသစ်အဆန်းတော့မဟုတ်ပါဘူး။ ဘာကြောင့်လဲဆိုတော့ ကျွန်မတို့ ၂၀၀၀ခုနှစ်မှာ ရုတ်တရက်အင်တာနက်ဆိုတာရသွားကြပြီး ၂၀၁၅ရောက်တဲ့အချိန်မှာ လူတိုင်းဖုန်းကိုယ်စီနဲ့ဖြစ်နေကြပြီ။
အခုဆို ဥပမာ လူတစ်ယောက်က ဖေ့စ်ဘုတ်မှာ စစ်အစိုးရကို တိုက်ထုတ်ဖို့ နှစ်ပတ်အတွင်း UNကလာမှာလို့ တင်လိုက်တယ်။ ဒါမျိုးက တအားမျှော်လင့်စရာဖြစ်တယ်။ ဒါပေမယ့် ပြည်သူတွေအတွက် မျှော်လင့်ချက်အမှားကြီးဖြစ်နေတယ်။ ကျွန်မအမေ၊ အဖွားနဲ့ အဖိုးတို့ဆိုတာ လူငယ်တွေမဟုတ်ကြတော့ဘူးဆိုတော့ ဒီလိုမျှော်လင့်ချက်အမှားမျိုးတွေကို ယုံကြတယ်။
မြန်မာမှာဆိုရင် ဖေ့စ်ဘုတ်က အဓိကပလက်ဖောင်းဖြစ်နေတာပါ။ သင်ကြားရေး၊ ဆက်သွယ်ရေး၊ သတင်းတွေအတွက်အပြင် စီးပွားရေးလုပ်မယ်ဆိုရင်တောင် ဖေ့စ်ဘုတ်က အဓိကနေရာပါပဲ။
နောက်ဥပမာတစ်ခုကို ကျွန်မပြောရမယ်ဆိုရင် ဒီနေ့မနက်မကြာသေးခင်က အဆိုတော်တစ်ယောက်ဆုံးပါးသွားတယ်။ ဒီကိစ္စအတွက် သတင်းအမှားတွေအများကြီးရှိနေတယ်။ တချို့လူတွေက သူငှက်ဖျားနဲ့ဆုံးသွားတယ်တဲ့။ တချို့ကတော့ သူကမူးယစ်ဆေးသုံးလို့တဲ့။ နောက် တချို့လူတွေကပြောတယ် ‘မဟုတ်ဘူး။ စစ်တပ်ကသတ်လိုက်တာဟ’တဲ့။ ကျွန်မ တကယ်စိုးရိမ်လာတယ်။ ဘာကြောင့်လဲဆိုတော့ ကျွန်မဖေ့စ်ဘုတ်ကိုဖွင့်တဲ့အခါမှာ သတင်းက သုံးလေးမျိုးတက်လာပြီး ဘယ်တစ်ခုက ကျွန်မယုံကြည်ရမယ့်ဟာဆိုတာ လုံးဝမသိဘူးရှင့်။ မှန်မမှန်စစ်ဖို့ဆိုတာ အတော်လေးကိုခက်ခဲ့တာပေါ့။”