အပိုင်း (၆၉) : တတိယလှိုင်း
မြန်မာပြည်မှာ ဖေဖော်ဝါရီကတည်းက စစ်တပ်အာဏာသိမ်းထားလို့ အိပ်မက်ဆိုးကြီးထဲမှာ နေ,နေရတုန်း လတ်တလောမှာပဲ Delta မျိုးကွဲ ကိုဗစ်ဗိုင်းရပ် တရှိန်ထိုးပျံ့နှံ့မှုကို စစ်တပ်အုပ်ချုပ်မှုက ထိန်းချုပ်လို့ မရရုံသာမက အခြေအနေကို ပိုပြီးဆိုးရွားအောင် တွန်းပို့နေပါတယ်။ ပြည်သူတွေက Coup နဲ့ Covid နှစ်ထပ်ကွမ်း အကျပ်အတည်းကို “Coupvid”(ကူးဗစ်) လို့ စတင်ညွှန်းဆိုလာကြပါတယ်။ ဒီခက်ခဲတဲ့ကာလ နေ့စဉ်နဲ့အမျှ ရှင်သန်ဖို့ ရုန်းကန် ရင်ဆိုင်နေရတဲ့ ဗမာပြည်သူတွေရဲ့ အခက်အခဲတွေကို အတိအကျ ထင်ဟပ်စေတဲ့ အသုံးအနှုန်းပါပဲ။ ဒီအပိုင်းမှာ ကျွန်တော်တို့ ဧည့်သည်သုံးဦးက ကူးဗစ်ကာလ နေ့စဉ်ဘဝတွေအကြောင်း လူထုကြီးအတွက်စိတ်သောကမှ ရေရှည်မှာ ဖြစ်လာနိုင်တဲ့ အကျိုးဆက်တွေနဲ့ နောက်ပြီး ကျွန်တော်တို့တွေ လုံခြုံတဲ့နေရာတွေကနေ စည်းလုံးညီညွတ်မှုနဲ့ ထောက်ပံ့မှုကို ပြသနိုင်ဖို့ ဘာတွေလုပ်ပေးနိုင်မလဲ ဆွေးနွေးထားပါတယ်။
ယူအက်စ်မှာအခြေချနေထိုင်တဲ့ Alyson နဲ့ Sandra ကမြန်မာပြည်က မိသားစုတွေနဲ့ ဆေးလောကထဲက ဝန်ထမ်းတွေအတွက် ကူးဗစ်နဲ့ ပတ်သက်လို့ အတွေ့အကြုံရနေတဲ့ တရုတ်-ဗမာ ဆေးကျောင်းသူတွေပါ။ ဖေဖော်ဝါရီကတည်းက တိုက်ခိုက်ခံရတဲ့ ကျန်းမာရေးဝန်ထမ်းတွေကိုယ်စား အမျိုးသမီးငယ်လေး နှစ်ယောက်လုံးက ထောက်ခံအားပေးခဲ့သူတွေပါ။ အရေးပေါ် အထောက်အပံ့ပစ္စည်းတွေအတွက် ရန်ပုံငွေရှာဖွေထောက်ပံ့ခြင်း၊ တပ်မတော်က ကျန်းမာရေးဝန်ထမ်းတွေကို စတင်ပစ်မှတ်ထား ဖမ်းဆီးတိုက်ခိုက်ကတည်းက ပြည်သူတွေနဲ့ တသားတည်းဖြစ်ကြောင်း ပြသကြပါတယ်။
လုံခြုံရေးအရ “Michaela”လို့ အမည်ဝှက်သုံးထားတဲ့ ဧည့်သည်က လက်ရှိရန်ကုန်မှာနေပါတယ်။ သူမနဲ့ အခန်းဖော်မှာ ဂျူလိုင်လထဲ COVID-19 လက္ခဏာတွေရခဲ့ပါတယ်။ သူငယ်ချင်းတွေက သူတို့မှာ ပိုးရှိတယ်လို့ စစ်ဆေးပြီး အကြောင်းကြားခဲ့တာပါ။ Michaela က COVID ကနေ ပြန်လည်ကောင်းမွန်လာပြီး အခန်းဖော်ကိုလည်း ပြန်ကောင်းလာဖို့ သူနာပြုစုခဲ့ရကြောင်း၊ အကန့်အသတ်ရှိတဲ့ သတင်းတွေကြား ဆုံးဖြတ်ချက်တွေချရတဲ့အကြောင်း၊ သူမနဲ့အတူ အခြားသူတွေပါ ရင်ဆိုင်ရတဲ့ ကြောက်ရွံ့မှုနဲ့ မသေချာမရေရာမှုအကြောင်းနဲ့တကွ ကျန်းမာရေး စောင့်ရှောက်မှု မရရှိတဲ့အကြောင်း သူမရဲ့ကိုယ်တွေ့ဇာတ်လမ်းကို ပြောပြထားပါတယ်။
ဒီအပိုင်းထဲမှာ Bloom ကဗျာကို ရွတ်ဆိုထားတာ နားဆင်ရမှာပါ။ အာဏာသိမ်းမှုကို တုံ့ပြန်တဲ့အနေနဲ့ ဗုဒ္ဓဘာသာ ရဟန်းတော်တပါးက ရေးသားပေးပို့ထားတာပါ။ ဒီစွမ်းအားပြည့်ဝတဲ့ ကဗျာလေးကို အင်္ဂလိပ်လိုနဲ့ ဗမာလိုရော ပြန်ဆိုထားတဲ့ စကားပြေကို ကျေးဇူးပြု၍ အချိန်ခဏလေးယူပြီး ဖတ်ရှုနိုင်ပါပြီ။
အာဏာသိမ်းပြီးနောက်ကာလ ကျွန်တော်တို့ရဲ့ အင်တာဗျူးတွေထဲ ဒီနေ့ ဧည့်သည်တွေရဲ့ စိတ်ဝင်စားဖွယ်ကောင်းတဲ့ ဇာတ်လမ်းတွေက သောတရှင်တွေကို စိတ်ခွန်အားဖြစ်ဖို့ ကူညီလိမ့်မယ်၊ စိတ်သောကတွေနဲ့ အားငယ်နေကြတဲ့ မြန်မာပြည်သူတွေအတွက် ဘယ်လိုပုံံစံပဲဖြစ်ဖြစ် တနည်းမဟုတ် တနည်းနဲ့ အထောက်အကူဖြစ်ဖို့ ကျွန်တော်တို့ မျှော်လင့်ပါတယ် ခင်ဗျာ။